-
ఇకపై పవర్ఫుల్ విలన్ రోల్స్ చేస్తాను : శివాజీ
‘కోర్ట్’… ఇప్పుడు అందరూ ఈ సినిమానే చర్చించుకుంటున్నారు. గత శుక్రవారం విడుదలైన ఈ చిత్రం, నాని బ్యానర్‌కు భారీ విజయాన్ని అందించింది. ముఖ్యంగా, ఇందులో విలన్ పాత్ర పోషించిన శివాజీకి విపరీతమైన ప్రశంసలు లభించాయి.
తాజాగా ఓ యూట్యూబ్ ఛానల్‌కు ఇచ్చిన ఇంటర్వ్యూలో శివాజీ ఈ చిత్రాన్ని గురించి మాట్లాడారు. “గతంలో నేను హీరోగా ఎన్నో సినిమాలు చేశాను. ఎంతో అంకితభావంతో కష్టపడ్డాను, కానీ నేను కోరుకున్న స్టార్‌డమ్ అందుకోలేకపోయాను” అని తెలిపారు.
“ఎంతగా శ్రమించినా స్టార్‌డమ్ రాకపోవడంతో నాలో ఆవేదన పెరిగింది. అంతర్మథనం ఎక్కువైంది. అలాంటి సమయంలో నాకు ‘మంగపతి’ పాత్ర ఆఫర్ అయింది. కథ విన్నప్పుడే, ఇదే నా కోసం ఎదురుచూసిన పాత్ర అనిపించింది. క్షణం కూడా ఆలస్యం చేయకుండా వెంటనే అంగీకరించాను” అని చెప్పుకొచ్చారు.
“చిన్నప్పటి నుంచి ఎస్వీ రంగారావు, రావుగోపాలరావు, నాగభూషణం, నూతన్ ప్రసాద్ వంటి దిగ్గజ విలన్లను చూసి ఆనందించేవాడిని. వాళ్లు మాటల ద్వారా విలనిజాన్ని ఎలా ప్రదర్శించేవారో నాకు స్ఫూర్తిగా మారింది. ఎప్పటి నుంచో అలాంటి ఓ పవర్ఫుల్ పాత్ర చేయాలనుకున్నాను. ఈ సినిమా ద్వారా ఆ కోరిక తీరింది. ఆశ్చర్యకరంగా, నేను హీరోగా అందుకోలేకపోయిన స్టార్‌డమ్‌ను విలన్ పాత్ర నాకు ఇచ్చింది. ఇకపై మరిన్ని శక్తివంతమైన ప్రతినాయక పాత్రలు చేయాలని ఆశిస్తున్నాను” అని అన్నారు.
